ମୁଖ୍ୟ ପୃଷ୍ଟ। / odisha / Puri

ପୁରୀ ( ପି.ଏନ. ଏସ ) : ପୁରୀ ସମୁଦ୍ରକୂଳ ରାସ୍ତାର ବଳିଆପଣ୍ଡା ଅଞ୍ଚଳରେ ଭୂତ ଆତଙ୍କ ନେଇ ଗୁଜବ । ଏହାର ଭିଡିଓ ସୋସିଆଲ ମିଡିଆରେ ଭାଇରାଲ୍ ହେବାରେ ଲାଗିଛି । ତେବେ ଏହା କେତେ ସତ୍ୟ ତାହା ଜଣାପଡ଼ିନାହିଁ । ସୂଚନା ମୁତାବକ, ସମୁଦ୍ରକୂଳ ରାସ୍ତାର ଏକ ତାରକା ହୋଟେଲ ନିକଟରେ ଶୁକ୍ରବାର ରାତିରେ କିଛି ଯୁବକ ଜନ୍ମଦିନ ପାଳନ କରି କେକ୍ କାଟୁଥିଲେ । ଏହି ସମୟରେ ହଠାତ୍ ଏକ ଝଙ୍କାଳିଆ ପବନ ଆସିଥିଲା ।
ଯାହା ପରେ ଜଣେ ଅଦୃଶ୍ୟ ମହିଳା ଗୋଡ଼ାଇ ଗୋଡ଼ାଇ ଯୁବକମାନଙ୍କୁ ଆକ୍ରମଣ କରିଥିଲା । ଆକ୍ରମଣରେ ଜଣେ ଯୁବକଙ୍କ ପିଠି ଓ ଅନ୍ୟ ସ୍ଥାନରେ ଗୁରୁତର ଆଘାତ ଲାଗିଛି । ସେପଟେ ଜନ୍ମଦିନର ଭିଡିଓ ଉଠାଉଥିବା ଜଣେ ବ୍ୟକ୍ତି ତାଙ୍କ ମୋବାଇଲ୍‌ରେ ଭୂତର ଛବି ଓ ତାହାର କରୁଣ କ୍ରନ୍ଦନକୁ କଏଦ କରିଥିବା ଦାବି କରିଛନ୍ତି । କିଛି ବର୍ଷ ତଳେ ଏଠାରେ ଜଣେ ମହିଳାଙ୍କୁ ହତ୍ୟା କରାଯାଇଥିଲା । ଏହି ଅତୃପ୍ତ ଆତ୍ମା ନିଜ ପ୍ରଭାବ ଏଠାରେ ଦେଖାଉଥିବା ଅଭିଯୋଗ ହୋଇଛି ।
କିଛି ଲୋକ ଏହାକୁ ବିଶ୍ଵାସ କରୁଥିବା ବେଳେ ଅନେକ ଅବିଶ୍ଵାସ କରୁଛନ୍ତି।
ଅବିଶ୍ଵାସ କରୁଥିବା ଲୋକେ ଏହା ଏକ ଷଡ଼ଯନ୍ତ୍ର ହୋଇପାରେ ବୋଲି ମତ ଦେଇଛନ୍ତି । ତେବେ ଏନେଇ ପୁଲିସ କିମ୍ବା ପ୍ରଶାସନର ପ୍ରତିକ୍ରିୟା ମିଳିପାରିନାହିଁ |