ମୁଖ୍ୟ ପୃଷ୍ଟ। / odisha / jagatsinghpur

ପାରାଦ୍ୱୀପ ( ପି.ଏନ. ଏସ ) : ଶିରି ହରାଉଛି ପାରାଦ୍ଵୀପ କଳିଙ୍ଗ ବାଲିଯାତ୍ରା । ଫାଙ୍କା ପଡିଛି ଅର୍ଦ୍ଧାଧିକ ଷ୍ଟଲ, ଆସୁନାହାନ୍ତି ଦର୍ଶକ । ସାଂସ୍କୃତିକ କାର୍ଯ୍ୟକ୍ରମ ବେଳେ ଫାଙ୍କା ପଡୁଛି ଚେୟାର । ଚଳିତବର୍ଷ କଳିଙ୍ଗ ବାଲିଯାତ୍ରା ରେ ବ୍ୟବସାୟ କୁ ନେଇ ବ୍ୟବସାୟୀ ଆଶଙ୍କାରେ ଥିବାବେଳେ ଛାଡଖାଇ ପରେ ଲୋକଙ୍କ ସମାଗମ ହେବ ବୋଲି ରହିଛି ଆଶା ।

ଚଳିତବର୍ଷ ପାରାଦ୍ଵୀପ କଳିଙ୍ଗ ବାଲିଯାତ୍ରା ସମ୍ପୁର୍ଣ୍ଣ ନୈରାଶ୍ୟଜନକ ହୋଇଥିବା ଦେଖିବାକୁ ମିଳିଛି । ନାଁ ଆସୁଛନ୍ତି ଦର୍ଶକ , ନାଁ ଅଛନ୍ତି ବ୍ୟବସାୟୀ । ପ୍ରଶାସନ ଦ୍ବାରା ତିଆରି କରାଯାଇଥିବା ଷ୍ଟଲ୍ ଗୁଡ଼ିକ ଅଧାରୁ ଅଧିକ ଫାଙ୍କା ପଡିଛି । ନୌବାଣିଜ୍ୟ ର ପରମ୍ପରା କୁହାଯାଉଥିବା ଏହି କଳିଙ୍ଗ ବାଲିଯାତ୍ରା ପ୍ରତି ଚଳିତବର୍ଷ ବ୍ୟବସାୟୀମାନେ ଆଗ୍ରହ ଦେଖାଇ ନାହାନ୍ତି । ଏହାର ପ୍ରମୁଖ କାରଣ ଗତ ବର୍ଷ ଠାରୁ ପ୍ରଶାସନ ପକ୍ଷରୁ ଷ୍ଟଲ ର ଭଡ଼ା ବୃଦ୍ଧି ଏବଂ ଷ୍ଟଲ ବଣ୍ଟନ ରେ ଅନିୟମିତତା ବୋଲି ଅଭିଯୋଗ ହେଉଛି । ଗତବର୍ଷ ଠାରୁ ଷ୍ଟଲ୍ ଭଡାକୁ ବୃଦ୍ଧି କରାଯାଇ ୮ ହଜାର ହୋଇଛି । ୭ ଦିନର ଏହି ବାଲିଯାତ୍ରା ରେ ମୁଖ୍ୟମନ୍ତ୍ରୀ ଙ୍କ କାର୍ଯ୍ୟକ୍ରମ ଦିନ ଷ୍ଟଲ ବନ୍ଦ କରାଯିବା ସହିତ ଉଦଯାପନୀ ଉତ୍ସବରେ ରାଜ୍ୟପାଳ ଙ୍କ କାର୍ଯ୍ୟକ୍ରମ ରହିଥିବାରୁ ଷ୍ଟଲ ବନ୍ଦ କରିବା ପାଇଁ କୁହାଯାଇଛି । ଏହାଛଡା ଉଠା ଦୋକାନୀ ମାନଙ୍କ ପାଇଁ ମଧ୍ୟ କଟକଣା ଲଗାଯାଇଛି । ମାତ୍ର ୫ ଦିନର ବ୍ୟବସାୟରେ ଷ୍ଟଲ୍ ଭଡ଼ା ଓ ଇଲେକ୍ଟ୍ରି ଭଡ଼ା ଉଠିବା ନେଇ ଆଶଙ୍କା କରିଛନ୍ତି ବ୍ୟବସାୟୀ ।

କଳିଙ୍ଗ ବାଲିଯାତ୍ରା ରେ ଚଳିତ ବର୍ଷ ସ୍ଥାନୀୟ କଳାକାର ମାନଙ୍କୁ ପ୍ରାଧାନ୍ୟ ଦିଆଯାଇଥିବା ବେଳେ, ଓଡ଼ିଶାର ବିଭିନ୍ନ ଜିଲ୍ଲାରେ ପ୍ରଚଳିତ ଲୋକକଳା ଓ ଲୋକନୃତ୍ୟ କୁ ସାମିଲ କରାଯାଇଛି । ଏଥିସହିତ ରାଜ୍ୟ ଓ ରାଜ୍ୟ ବାହାରର କଳାକାରମାନଙ୍କ ଦ୍ବାରା ରଙ୍ଗାରଙ୍ଗ କାର୍ଯ୍ୟକ୍ରମ ମଧ୍ୟ ଆୟୋଜନ କରାଯାଉଛି । ଚଳିତବର୍ଷ ବଲିଉଡ୍ କଳାକାର ମାନଙ୍କ ଦ୍ବାରା ସାଂସ୍କୃତିକ କାର୍ଯ୍ୟକ୍ରମ ପରିବେଷଣ କରାଯିବାର ବ୍ୟବସ୍ଥା କରାଯାଇଛି। ଗୋଟିଏ ପଟେ ଷ୍ଟଲ ଫାଙ୍କା ପଡିଥିବା ବେଳେ ଦର୍ଶକ ଆସୁନଥିବାରୁ ସବୁକିଛି ଫିକା ପଡୁଛି । ତେବେ ଚଳିତବର୍ଷ ୫୦୦ ରୁ ଉର୍ଦ୍ଧ୍ୱ ଷ୍ଟଲ ରେ ବ୍ୟବସାୟ ପାଇଁ ଦିଆଯାଇଛି , ଯେଉଁଗୁଡିକ ଫାଙ୍କା ଅଛି ସେମାନେ ଜିନିଷ ଆଣିଛନ୍ତି କିନ୍ତୁ ଖଞ୍ଜି ନାହାଁନ୍ତି । ଆଜି ଠାରୁ ସମସ୍ତ ଷ୍ଟଲ ଖୋଲା ହୋଇଯିବ ଏବଂ ଲୋକଙ୍କ ଭିଡ଼ ମଧ୍ୟ ହେବ ବୋଲି ବାଲିଯାତ୍ରା କମିଟି ଉପାଧ୍ୟକ୍ଷ ତଥା ପାରାଦ୍ଵୀପ ଅତିରିକ୍ତ ଜିଲ୍ଲାପାଳ ପ୍ରକାଶ କରିଛନ୍ତି ।
ପ୍ରଶାସନିକ ଅଧିକାରୀ ଙ୍କ ପରିଚାଳନା ଗତ ତୃଟି ଯୋଗୁଁ ଧିରେ ଧିରେ ଚମକ ହରାଉଛି ନୌବାଣିଜ୍ୟ ର ଐତିହ୍ୟ କୁହାଯାଉଥିବା ପାରାଦ୍ଵୀପ କଳିଙ୍ଗ ବାଲିଯାତ୍ରା। ଏହାକୁ ପୂର୍ବବର୍ଷ ଭଳି ବ୍ୟବସାୟୀ ଓ ଦର୍ଶକଙ୍କୁ ଆକୃଷ୍ଟ କରିବା ଭଳି ପରିଚାଳନା କରାଯିବାକୁ ସାଧାରଣରେ ଦାବି ହେଉଛି ।