ମୁଖ୍ୟ ପୃଷ୍ଟ। / odisha / jagatsinghpur

ନାଉଗାଁ ( ପି.ଏନ. ଏସ ) : ଜଗତସିଂହପୁର ଜିଲ୍ଲା ନାଉଗାଁ ଥାନା ଅନ୍ତର୍ଗତ ରୋହିଆ ପଞ୍ଚାୟତର ଅରଖକୁଦ ଗ୍ରାମରେ ଭାରତୀୟ ସେନାବାହିନୀ ର ଜଣେ କାର୍ଯ୍ୟରତ ସୈନିକଙ୍କ ଶେଷକୃତ୍ୟ ସମ୍ପନ୍ନ ସମୟରେ ବିଭାଗ ପକ୍ଷରୁ ତାଙ୍କୁ ରାଷ୍ଟ୍ରୀୟ ସମ୍ମାନ ପ୍ରଦାନ କରାଯାଇଛି। ସୂଚନା ଅନୁସାରେ ଉକ୍ତ ଗ୍ରାମର ପ୍ରକାଶ ନାୟକଙ୍କ ପୁଅ ପ୍ରଭାସ ନାୟକ ୨୦୧୮ ମସିହାରେ ଭାରତୀୟ ସେନାବାହିନୀ ଆର୍ମି ବାଟାଲିୟନରେ ନିଯୁକ୍ତି ପାଇଥିଲେ। ତେବେ ପ୍ରଭାସ ବର୍ତ୍ତମାନ ଆସାମରେ ସେନାବାହିନୀରେ କାର୍ଯ୍ୟରତ ଥିବା ବେଳେ ଗତ କିଛି ଦିନ ତଳେ ଛୁଟିରେ ଘରକୁ ଆସିଥିଲେ ଏବଂ ଗୁରୁବାର ସେ ସେନାରେ ଯୋଗ ଦେଇଥାନ୍ତେ। କିନ୍ତୁ ଗତ ବୁଧବାର ରାତି ପ୍ରାୟ ସାଢେ ଦଶଟା ସମୟରେ ପ୍ରଭାସ ତାଙ୍କ ଶଳାଙ୍କ ସହିତ ଏକ ବାଇକ୍ ଯୋଗେ କଟକରୁ ଘରକୁ ଫେରୁଥିବା ବେଳେ କଟକ - ନୂଆଗାଁ ୫୫ନମ୍ବର ଜାତୀୟ ରାଜପଥର ବିରିଡ଼ି ଥାନା ଅନ୍ତର୍ଗତ ବସନ୍ତପୁର ତେଲଟାଙ୍କି ନିକଟରେ ଏକ ପିକପ୍ ଭ୍ୟାନ ସହିତ ଧକ୍କା ହେବା ଫଳରେ ଘଟଣା ସ୍ଥଳରେ ଉଭୟ ଶଳା ଓ ଭିଣୋଇଙ୍କର ମୃତ୍ୟୁ ଘଟିଥିଲା। ତେବେ ପ୍ରଭାସଙ୍କ ମୃତ୍ୟୁ ଖବର ପାଇବା ପରେ ଅରଖକୁଦ ଗ୍ରାମର ଯୁବକ ମାନେ ତାଙ୍କ ମରଶରୀରକୁ ଏକ ବିରାଟ ଶୋଭାଯାତ୍ରାରେ ନାଉଗାଁ ବଜାରରୁ ଗ୍ରାମକୁ ନିଆଯାଇଥିଲା ଏହା ସହିତ ବିଭାଗ ପକ୍ଷରୁ ତାଙ୍କ ମରଶରୀରକୁ ରାଷ୍ଟ୍ରୀୟ ସମ୍ମାନ ପ୍ରଦାନ କରାଯିବା ପରେ ଗାଁ ମଶାଣିରେ ତାଙ୍କର ଶେଷକୃତ୍ୟ ସଂପନ୍ନ କରାଯାଇଛି।