ହାଇକୋର୍ଟଙ୍କ ନିର୍ଦ୍ଦେଶରେ ପାରାଦ୍ୱୀପରେ ଗିରଫ ହେଲା ପୁଣି ଏକ ଜାହାଜ ।
pragyansila bureau | 28 Oct 2025 | 7 min read | 2 views
ପାରାଦ୍ୱୀପ ( ପି.ଏନ. ଏସ ) : ପୁଣି ଥରେ ଗିରଫ ହେଲା ଆଉ ଏକ ଜାହାଜ । ପାରାଦ୍ଵୀପ ବନ୍ଦରରେ ଥିବା ଏକ ଜାହାଜ ଏମ୍. ଭି. ମ୍ୟାଗ୍ନେଟ୍ ଟିମ୍ କୁ ଗିରଫ କରିବା ପାଇଁ ମାନ୍ୟବର ହାଇକୋର୍ଟ ସୋମବାର ନିର୍ଦ୍ଦେଶ ଦେଇଥିଲେ । ରୁଷିଆରୁ କୁକିଙ୍ଗ କୋଲ୍ ନେଇ ଆସିଥିଲା ଏହି ଜାହାଜ । ଏହି ଜାହାଜ ଉପରେ ୨କୋଟି ୧୧ଲକ୍ଷ ୮୨ ହଜାର ୬୫୬ଟଙ୍କା ବକେୟା ରହିଥିଲା । ଏହି ଟଙ୍କା ନଦେବାରୁ ସିଲ୍କ ରୋଡ୍ ସିପିଂ ଆଣ୍ଡ ଚାର୍ଟରିଂ ସଂସ୍ଥା ହାଇକୋର୍ଟଙ୍କ ଦ୍ଵାରସ୍ଥ ହୋଇଥିଲା । ହାଇକୋର୍ଟର ବିଚାରପତି ତଥା ଆଡ୍ମିରାଲିଟି ଜଷ୍ଟିସ୍ ଭି. ନରସିଂହ ଗତକାଲି ମାମଲାର ତ୍ବରିତ ବିଚାର କରି ଜାହାଜକୁ ଗିରଫ ପାଇଁ ନିର୍ଦ୍ଦେଶ ଦେଇଥିଲେ । ତେବେ ମାନ୍ୟବର ହାଇକୋର୍ଟ ନିର୍ଦ୍ଦେଶ କ୍ରମେ ଏହି ଜାହାଜକୁ ଗିରଫ କରାଯାଇଥିବା ସୂଚନା ମିଳିଛି । ଏଥିସହ ଜାହାଜର ମାଲିକଙ୍କୁ ମଧ୍ୟ ଜବାବ ରଖିବା ପାଇଁ ନିର୍ଦ୍ଦେଶ ଦେଇଛନ୍ତି । ଆସନ୍ତା ଡିସେମ୍ବର ପହିଲାରେ ମାମଲାର ପରବର୍ତ୍ତୀ ଶୁଣାଣି ହେବା ପର୍ଯ୍ୟନ୍ତ ଜାହାଜ ପାରାଦ୍ଵୀପ ବନ୍ଦରର ଆଙ୍କରେଜ ରେ ରହିବ। ଆବେଦନକାରୀ ସଂସ୍ଥା ପକ୍ଷରୁ ହାଇକୋର୍ଟରେ ଏହି ମାମଲା ରୁଜୁ କରାଯିବା ସହିତ ଯଦି ଜାହାଜକୁ ତୁରନ୍ତ ଗିରଫ କରା ନଯାଇଥିଲେ ଜାହାଜ ମଙ୍ଗଳବାର ପାରାଦ୍ଵୀପ ବନ୍ଦର ଛାଡ଼ି ଦେବାର ସମ୍ଭାବନା ରହିଥିଲା । ହାଇକୋର୍ଟ ଏହି ମାମଲାକୁ ବିଚାର ପାଇଁ ଗ୍ରହଣ କରି, ଅଭିଯୋଗର ପ୍ରାଥମିକ ପ୍ରମାଣ ଥିବା ଜାଣିବାକୁ ପାଇବା ପରେ ତୁରନ୍ତ ପାରାଦ୍ଵୀପ ବନ୍ଦରରେ ଜାହାଜକୁ ଗିରଫ କରିବା ପାଇଁ ହାଇକୋର୍ଟ ଅନ୍ତରୀଣ ଆଦେଶରେ ନିର୍ଦ୍ଦେଶ ଦେଇଥିଲେ । ତେବେ ଜାହାଜରେ ଯଦି କୌଣସି ସାମଗ୍ରୀ ଥାଏ ତାହେଲେ ଏହାକୁ ଅନ୍ଲୋଡ୍ କରିବାରେ ଏହି ମାମଲା କୌଣସି ଅନ୍ତରାୟ ସୃଷ୍ଟି କରିବ ନାହିଁ ବୋଲି ହାଇକୋର୍ଟ ଆଦେଶରେ ସ୍ପଷ୍ଟ କରିଛନ୍ତି ।
