ମୁଖ୍ୟ ପୃଷ୍ଟ। / odisha / jagatsinghpur

ପାରାଦ୍ୱୀପ ( ପି.ଏନ. ଏସ ) : ଦିନକୁ ୧୦୦ ଟଙ୍କାର ଫୁଲ ବିକ୍ରି କରୁଥିବା ଜଣେ ବୃଦ୍ଧା ଙ୍କୁ ଗଣେଶ ପୂଜା ପାଇଁ ୫ ହଜାର ଟଙ୍କା ର ଚାନ୍ଦା ଜୁଲମ । ଏଭଳି ଘଟଣା ଘଟିଛି ପାରାଦ୍ଵୀପ ଥାନା ଅଧିନ ବିଜୟଚନ୍ଦ୍ରପୁର ତାରିଣୀଗଡାରେ । ଚାନ୍ଦା ଜୁଲମ ର ଏକ ଭିଡିଓ ଭାଇରାଲ ହେଉଥିବା ବେଳେ ଏଥିରେ କିଛି ଯୁବକ ଜଣେ ବୃଦ୍ଧା ଙ୍କ ଫୁଲକୁ ଫୋପାଡି ଦେଉଥିବା ଏବଂ ଏହି ଘଟଣା କୁ ଦେଖି ବୃଦ୍ଧା ଜଣଙ୍କ ଠକ ଠକ ହୋଇ ଥରିବା ସହିତ ବେହୋସ୍ ହୋଇଯିବାର ଦୃଶ୍ୟ ଦେଖିବାକୁ ମିଳିଛି । ତେବେ ଘଟଣାଟି ଗତକାଲି ଘଟିଥିଲେ ମଧ୍ୟ ଆଜି ବୃଦ୍ଧା ଜଣଙ୍କ ପାରାଦ୍ଵୀପ ଆଦର୍ଶ ଥାନା ରେ ଏତଲା ଦେଇଛନ୍ତି । ପ୍ରତ୍ୟେକ ଦିନ ସେମାନେ କୁଜଙ୍ଗ ହସିଣା ଗ୍ରାମରୁ କିଛି ମହିଳା ତାରିଣୀଗଡାରେ ପରିବା ଓ ଫୁଲ ବିକ୍ରି କରନ୍ତି । ତେବେ ଗତକାଲି କିଛି ଯୁବକ ସେମାନଙ୍କୁ ୫ ହଜାର ଲେଖାଏଁ ଗଣେଶ ପୂଜା ଚାନ୍ଦା ଦେବାକୁ କହିଥିଲେ। ସେମାନେ ମନା କରିବାରୁ ମହିଳା ମାନଙ୍କୁ ଧମକ ଦେବା ସହିତ ଫୁଲ ବିକ୍ରି କରୁଥିବା ବୃଦ୍ଧା ବସନ୍ତ ବିଶ୍ବାଳ ଙ୍କ ଫୁଲ କୁ ଫୋପାଡି ଦେଇଥିଲେ । ଯଦି ଚାନ୍ଦା ନଦେବ, ତେବେ କାଲିଠାରୁ ଏଠି ବିକ୍ରି କରିପାରିବ ନାହିଁ ବୋଲି ଧମକ ଦେଇଥିଲେ । ବୃଦ୍ଧା ବସନ୍ତ ବିଶ୍ବାଳ ଭୟରେ ଥରି ଥରି ବେହୋସ୍ ହୋଇଯିବାରୁ ତାଙ୍କୁ ସେଠାରେ ଥିବା ଜଣେ ବ୍ୟକ୍ତି ଯୁବକ ମାନଙ୍କୁ ପାଟି କରିବା ସହିତ ମେଡିକାଲ ନେଇ ଚିକିତ୍ସିତ କରିଥିଲେ ବୋଲି ଏତଲାରେ ଦର୍ଶାଇବା ସହିତ ସେମାନଙ୍କ ବିରୋଧରେ ଦୃଢ କାର୍ଯ୍ୟାନୁଷ୍ଠାନ ପାଇଁ ଦାବି କରିଛନ୍ତି |