ମୁଖ୍ୟ ପୃଷ୍ଟ। / odisha / Mayurbhanja

ମୟୂରଭଞ୍ଜ ( ପି.ଏନ. ଏସ ) : ଦୀର୍ଘ 11 ବର୍ଷ ଧରି ନିଖୋଜ ଥିବା ବଡସାହି ଥାନା ଅନ୍ତର୍ଗତ ଜଗନ୍ନାଥପୁର ଗାଁର ସୁଦାମ ହେମ୍ବ୍ରମଙ୍କୁ ମୟୂରଭଞ୍ଜ ଜିଲ୍ଲା ପୁଲିସ୍ ଓ ପ୍ରଶାସନ ସହାୟତାରେ ସୁରକ୍ଷିତ ଭାବେ ନିଜ ଘରକୁ ପ୍ରତ୍ୟାବର୍ତ୍ତନ କରାଯାଇଛି । ଜିଲ୍ଲା ପୁଲିସ୍, ଜିଲ୍ଲା ପ୍ରଶାସନ ଏବଂ ଭାରତୀୟ ଦୂତାବାସ ତଥା ବାଂଲାଦେଶ ଦୂତାବାସର ସାମୁହିକ ଉଦ୍ୟମ ଯୋଗୁଁ ନିଖୋଜ ଥିବା ସୁଦାମ ହେମ୍ବ୍ରମ ସୁରକ୍ଷିତ ଭାବେ ତାଙ୍କ ପରିବାର ସହ ନିଜ ଘରକୁ ପ୍ରତ୍ୟାବର୍ତ୍ତନ କରିଛନ୍ତି ।

ଉଲ୍ଲେଖ ଯୋଗ୍ୟ ଯେ, ମୟୁରଭଞ୍ଜ ଜିଲ୍ଲା ବଡ଼ସାହି ଥାନା ଅନ୍ତର୍ଗତ ଜଗନ୍ନାଥପୁର ଗାଁର ବାସିନ୍ଦା ସ୍ୱର୍ଗତ କିଶୋର ହେମ୍ବ୍ରମଙ୍କ ପୁତ୍ର ସୁଦାମ ଗତ 2014 ମସିହାଠାରୁ ନିଖୋଜ ହୋଇଯାଇଥିଲେ। ସେ ଭାରତ–ବାଂଲାଦେଶ ସୀମା ଅତିକ୍ରମ କରି ଚାପାଇ ନବାବଗଞ୍ଜ ଅଞ୍ଚଳରେ ପହଞ୍ଚିଥିଲେ ।

ଗତ 28.10.2025 ତାରିଖରେ ଭାରତୀୟ ଦୂତାବାସ ତଥା ବାଂଲାଦେଶ ଦୁତାବାସ ପକ୍ଷରୁ ମୟୁରଭଞ୍ଜ ଜିଲ୍ଲାପାଳ ତଥା ଜିଲ୍ଲା ପୋଲିସକୁ ସୁଦାମଙ୍କ ସମ୍ପର୍କରେ ସୂଚନା ହସ୍ତଗତ ହୋଇଥିଲା ।

ବାଂଲାଦେଶ ଦୁତାବାସ, ଢାକାଙ୍କ ନିର୍ଦ୍ଦେଶ ଅନୁଯାୟୀ, ମୟୂରଭଞ୍ଜ ଜିଲ୍ଲା ପୁଲିସ୍ ସୁଦାମ ହେମ୍ବ୍ରମଙ୍କ ପରିଚୟ ଓ ଅନ୍ୟାନ୍ୟ କାର୍ଯ୍ୟ ସମ୍ପୂର୍ଣ୍ଣ କରିଥିଲା । ପରେ ଜିଲ୍ଲା ପୁଲିସ୍ ଓ ଜିଲ୍ଲା ପ୍ରଶାସନର ଏକ ମିଳିତ ଟିମ୍ ଗଠନ କରାଯାଇ ସୁଦାମଙ୍କୁ ପ୍ରତ୍ୟାବର୍ତ୍ତନ କରିବା ନିମନ୍ତେ ସମସ୍ତ ପ୍ରକିୟା ଆରମ୍ଭ କରିଥିଲେ ।

ସେହି ଅନୁଯାୟୀ, ଗତ 06.12.2025 ତାରିଖରେ ମୟୂରଭଞ୍ଜ ଜିଲ୍ଲା ପୁଲିସ୍, ଜିଲ୍ଲା ପ୍ରଶାସନ ଏବଂ ସୁଦାମଙ୍କ ପରିବାର ସଦସ୍ୟଙ୍କ ସମେତ ଏକ ଟିମ୍‌ ପଶ୍ଚିମବଙ୍ଗର ହରିଦାସପୁର / ବେନାପୋଲେ ଲ୍ୟାଣ୍ଡ ଚେକ୍ ପୋଷ୍ଟକୁ ଗସ୍ତ କରିଥିଲେ। ସେଠାରେ ସମସ୍ତ ସରକାରୀ ଓ ସୀମା ସମ୍ବନ୍ଧୀୟ ପ୍ରକ୍ରିୟା ସମାପ୍ତ ହେବା ପରେ ଆଜି ବାଂଲାଦେଶ କର୍ତ୍ତୃପକ୍ଷ ସୁଦାମଙ୍କୁ ହସ୍ତାନ୍ତର କରିଥିଲେ । ପରିବାରବର୍ଗ ଦୀର୍ଘ ୧୧ ବର୍ଷ ପରେ ପୁଅକୁ ପାଇ ଜିଲ୍ଲା ପୋଲିସ ଓ ପ୍ରଶାସନକୁ କୃତଜ୍ଞତା ଜ୍ଞାପନ କରିଛନ୍ତି ।